නව අධ්‍යාපන ප්‍රතිසංස්කරණ පිළිබඳ අගමැතිනියගෙන් පැහැදිලි කිරීමක්

නව අධ්‍යාපන ප්‍රතිසංස්කරණ පිළිබඳ අගමැතිනියගෙන් පැහැදිලි කිරීමක්

සමාජ මාධ්‍ය, ගුරු සංගම් සහ ඇතැම් ප්‍රධාන ධාරාවේ මාධ්‍ය මගින් සාමාන්‍ය පෙළ විෂයයන් සම්බන්ධයෙන් පැතිර යන දුර්මත පිළිබඳව අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරිය මහත්මිය ඊයේ (ජූලි 18) පැහැදිලි කිරීමක් සිදු කළාය. ඉතිහාසය, සෞන්දර්ය සහ වෘත්තීය විෂයන් විෂය මාලාවෙන් ඉවත් කර ඇති බවට පැතිර යන අසත්‍ය ප්‍රචාරයන් ඇය ප්‍රතික්ෂේප කළාය.
අග්‍රාමාත්‍යවරිය අවධාරණය කළේ, නව අධ්‍යාපන ව්‍යුහය සිසුන් තෝරාගන්නා විෂය ක්ෂේත්‍රයට පමණක් සීමා නොවූ, සමාජය පිළිබඳ හැඟීමක් ඇති සහ වැඩ ලෝකයට අවශ්‍ය කුසලතා සහිත පුරවැසියෙකු බිහිකිරීමේ අරමුණින් සකසා ඇති බවයි. තම දරුවන්ගේ අධ්‍යාපනය සහ ජීවිත දේශපාලන අරමුණු සඳහා යොදා නොගන්නා ලෙසද ඇය මහජනතාවගෙන් ඉල්ලීමක් කළාය.
ප්‍රතිසංස්කරණවල හරය පැහැදිලි කරමින් අගමැතිනිය සඳහන් කළේ, උසස් පෙළ සඳහා විද්‍යා, තාක්ෂණ, ඉංජිනේරු විද්‍යාව හෝ කළමනාකරණය වැනි ධාරාවන් තෝරාගන්නා සිසුන්ට පවා ඉතිහාසය සහ සෞන්දර්ය විෂයන් හැදෑරීම අනිවාර්ය වන බවයි. සාමාන්‍ය පෙළ විභාගය සඳහා සිසුන් පෙනී සිටිය යුතු විෂයයන් සංඛ්‍යාව නවයේ (9) සිට හතක් (7) දක්වා අඩු කිරීමට යෝජනා වී ඇති අතර, එය අනිවාර්ය මූලික විෂයයන් පහකින් සහ තවත් විෂයයන් දෙකකින් සමන්විත වේ.
පොදු මූලික විෂය මාලාවට අනුව මව්බස, ඉංග්‍රීසි භාෂාව, ගණිතය, විද්‍යාව සහ ආගම හා සාරධර්ම අධ්‍යයනය යන විෂයයන් සියලුම සිසුන්ට අනිවාර්ය වෙයි. මීට අමතරව, ඉතිහාසය, සෞන්දර්ය අධ්‍යාපනය, භූගෝල විද්‍යාව, පුරවැසි අධ්‍යාපනය, තොරතුරු තාක්ෂණය ඇතුළු විෂයයන් ලැයිස්තුවකින් සිසුන් විසින් විෂයයන් දෙකක් තෝරාගත යුතුය.
සාමාන්‍ය පෙළ විභාගයට අමතරව, උසස් පෙළ ඉලක්ක කරගත් 'වැඩිදුර අධ්‍යාපන විෂය මාලාවක්' ද සිසුන් හැදෑරිය යුතු අතර, ඒ යටතේ තවත් විෂයයන් හතක් අධ්‍යයනය කිරීමට නියමිතය. මෙහිදී විශේෂත්වය වන්නේ, සිසුවෙකු කුමන විෂය ක්ෂේත්‍රයක් තෝරා ගත්තද, එම සියලුම සිසුන්ට ඉතිහාසය සහ සෞන්දර්ය විෂයයන් හැදෑරීම අනිවාර්ය වීමයි. විෂය අන්තර්ගතය සිසුන්ගේ අනාගත අධ්‍යාපන මාවතට ගැලපෙන පරිදි නම්‍යශීලීව සකසා ඇති බැවින් විෂය භාරය අඩු වන බව අධ්‍යාපන අමාත්‍යාංශ නිලධාරීන් පෙන්වා දෙයි.
මෙම ප්‍රතිසංස්කරණ යටතේ දැනට පවතින A, B, C, S ශ්‍රේණිගත කිරීමේ ක්‍රමය වෙනුවට, විශ්වවිද්‍යාලවල භාවිතයට සමාන ශ්‍රේණි ලකුණු සාමාන්‍යයක් (GPA) හඳුන්වා දීමටද යෝජනා වී ඇත. සම්පූර්ණ කළ යුතු මුළු ක්‍රෙඩිට් සංඛ්‍යාව 35ක් වන අතර, අධ්‍යයන කටයුතු අවසානයේ සිසුන්ට ලැබෙන සහතිකය, විශ්වවිද්‍යාල ප්‍රතිලේඛනයකට (transcript) සමාන ලේඛනයක් වනු ඇත.