අලි සම්පත රැකගනිමු අලි සංරක්ෂණයේ වැදගත්කම සහ උපාය මාර්ග
අලියා යනු ලොව විශාලතම ගොඩබිම ජීවත්වන ක්ෂීරපායී සත්වයා වන අතර, එය පරිසර පද්ධතියේ සමතුලිතතාවය පවත්වා ගෙන යාම සඳහා අත්‍යවශ්‍ය කාර්යභාරයක් ඉටු කරයි. අලින් වනාන්තර ව්‍යාප්ත කිරීමට, බීජ විසුරුවා හැරීමට සහ ජල මූලාශ්‍ර නිර්මාණය කිරීමට දායක වේ. එහෙත්, අද වන විට අලි ඇතුන් විවිධ තර්ජන වලට මුහුණ දෙමින් සිටින අතර, ඔවුන්ගේ පැවැත්ම බරපතල අවදානමකට ලක්ව ඇත. අලි සංරක්ෂණයේ වැදගත්කම, අලින්ට බලපාන ප්‍රධාන
තර්ජන සහ ඔවුන් රැක ගැනීම සඳහා ගත හැකි උපාය මාර්ග පිළිබඳව සොයා බැලීමකින් අනතුරුව අලි සම්පත රැක ගැනීමට කටයුතු කළ යුතුව ඇත.
අලින්ට බලපාන ප්‍රධාන තර්ජන
අලි ඇතුන්ගේ පැවැත්මට බලපාන ප්‍රධාන තර්ජන කිහිපයක් හඳුනාගෙන ඇත. අලින්ගේ වාසස්ථාන අහිමි වීම, අලි - මිනිස් ගැටුම්, දඩයම් කිරීම සහ දේශගුණික විපර්යාස අලි ඇතුන්ට බලපාන ප්‍රධාන තර්ජන කිහිපයකි.
ජනගහන වර්ධනය, කෘෂිකාර්මික ව්‍යාප්තිය සහ යටිතල පහසුකම් සංවර්ධනය හේතුවෙන් අලින්ගේ ස්වභාවික වාසස්ථාන ශිඝ්‍රයෙන් අහිමි වෙමින් පවතී. වනාන්තර එළි කිරීම සහ අලින්ගේ චලනයට බාධා පමුණුවන මාර්ග, දුම්රිය මාර්ග සහ ජනාවාස ඉදිකිරීම වාසස්ථාන අහිමි වීමට හේතු වී ඇත. මෙය අලින්ට ආහාර, ජලය සහ අභිජනන ප්‍රදේශ සොයා ගැනීම දුෂ්කර කරයි.
අලි - මිනිස් ගැටුම්
වාසස්ථාන අහිමි වීමත් සමඟ අලි ඇතුන් ආහාර සොයා ගම්මාන වලට ඇතුළු වීම වැඩි වී ඇත. මෙය හානි, දේපළ හානි සහ මිනිස් ජිවිත හානි පවා සිදු කරයි.
මෙවැනි ගැටුම් හේතුවෙන් අලින්ට ද හානි සිදුවන අතර, සමහර අවස්ථාවලදී අලින් මරා දැමීමට ද මිනිසුන් පෙළඹේ. මෙය අලි සංරක්ෂණයට විශාල තර්ජනයක් වී ඇත.
දඩයම් කිරීම
අලින්ට ඇති තවත් ප්‍රධාන තර්ජනයක් වන්නේ දඩයම් කිරීමයි. විශේෂයෙන්ම ඇත් දළ සඳහා ඇති ඉල්ලුම හේතුවෙන් අලින් නීති විරෝධී ලෙස දඩයමි කරනු ලැබේ. මෙය අලි ගහනය සීඝ්‍රයෙන් අඩු වීමට හේතු වී ඇති අතර, සමහර ප්‍රදේශ වල අලින් වඳවීමේ තර්ජනයට පත්ව ඇත.
ඇත් දළ වෙළඳාම ජාත්‍යන්තර වශයෙන් තහනම් කර තිබුණද, කළු කඩය හරහා තවදුරටත් සිදුවේ.
දේශගුණික විපර්යාස
දේශගුණික විපර්යාස හේතුවෙන් ඇති වන නියඟය සහ ගංවතුර වැනි ස්වභාවික විපත් අලින්ගේ වාසස්ථාන වලට සහ ආහාර මූලාශ්‍ර වලට බලපායි. මෙය අලින්ට ජලය සහ ආහාර සොයා දුෂ්කරතා ඇති කරන අතර, ඔවුන්ගේ ජීවනෝපායට තර්ජනයක් වේ.
අලි සංරක්ෂණ උපාය මාර්ග
අලි ඇතුන්ගේ පැවැත්ම තහවුරු කිරීම සඳහා විවිධ සංරක්ෂණ උපාය මාර්ග ක්‍රියාත්මක කරනු ලැබේ. මේවාට වාසස්ථාන ආරක්ෂා කිරීම, අලි - මිනිස් ගැටුම් අවම කිරීම, දඩයමි කිරීම වැළැක්වීම සහ ප්‍රජා සහභාගීත්වය දිරිමත් කිරීම කළ යුතු වේ.
වාසස්ථාන ආරක්ෂා කිරීම සහ ප්‍රතිසංස්කරණය කිරීම
අලින්ගේ ස්වභාවික වාසස්ථාන ආරක්ෂා කිරීම සහ ඒවායේ අඛණ්ඩතාව පවත්වා ගැනීම අලි සංරක්ෂණයේ මූලික පියවරකි. ආරක්ෂිත ප්‍රදේශ පුළුල් කිරීම, වන රක්ෂිත පිහිටුවීම සහ අලි සංක්‍රමණික මාර්ග ආරක්ෂා කිරීම මෙයට ඇතුළත් වේ. ඛණ්ඩනය වූ වාසස්ථාන සම්බන්ධ කිරීම සඳහා අලි කොරිඩෝ නිර්මාණය කිරීම ද වැදගත් වේ. වන වගා කිරීම සහ පරිසර පද්ධති ප්‍රතිසංස්කරණය කිරීම මගින් අලින්ට අවශ්‍ය ආහාර සහ ජලය සුරක්ෂිතකළ හැකිය.
අලි - මිනිස් ගැටුම් අවම කිරීම
අලි - මිනිස් ගැටුම් අවම කිරීම සඳහා විවිධ ක්‍රම වේදයන් භාවිතා කරනු ලැබේ. අලි වැටවල් ඉදිකිරීම, අලින්ට අප්‍රසන්න ශබ්ද හෝ ආලෝකය භාවිතා කිරීම, සහ අලි ගම්මාන වලට ඇතුළු වීම වැළැක්වීම සඳහා මුර සංචාර යෙදවීම මෙයට ඇතුළත් වේ.
අලින්ට හානි නොවන පරිදි ඔවුන් පලවා හැරීමට පුහුණු වූ කණ්ඩායම් යෙදවීම ද වැදගත් වේ. අලින්ට හානි නොවන විකල්ප භෝග වගා කිරීමට ගොවින් දිරිමත් කිරීම සහ වගා හානි සඳහා වන්දි ලබා දීම ද ගැටුම් අවම කිරීමට උපකාරී වේ.
දඩයම් කිරීම වැළැක්වීම
අලින් දඩයම් කිරීම වැළැක්වීම සඳහා දැඩි නීති ක්‍රියාත්මක කිරීම සහ නීති විරෝධී ඇත් දළ වෙළඳාම මැඩ පැවැත්වීම අත්‍යවශ්‍ය වේ. වනජීවී නිලධාරින්ගේ ධාරිතාව වැඩි කිරීම, තාක්ෂණය (උදා: ඩ්‍රෝන යානා, කැමරා උගුල්) භාවිතා කිරීම සහ දඩයම් විරෝධී මෙහෙයුම් ශක්තිමත් කිරීම මගින් දඩයම්කරුවන් අත්අඩංගුවට ගත හැකිය. ජාත්‍යන්තර සහයෝගීතාවය තුළින් ඇත් දළ ජාවාරම පාලනය කිරීම ද වැදගත් වේ.
ප්‍රජා සහභාගීත්වය සහ අධ්‍යාපනය
අලි සංරක්ෂණයේ සාර්ථකත්වය සඳහා ප්‍රජා සහභාගීත්වය අත්‍යවශ්‍ය වේ. අලින් සමග සහජිවනයෙන් ජීවත් වීමේ වැදගත්කම පිළිබඳව පුජාව දැනුවත් කිරීම, සංරක්ෂණ වැඩසටහන් සඳහා ඔවුන්ගේ සහභාගීත්වය දිරිමත් කිරීම සහ ඔවුන්ට විකල්ප ආදායම් මාර්ග ලබා දීම මගින් අලි සංරක්ෂණයට ඔවුන්ගේ සහයෝගය ලබා ගත හැකිය. පාසල් සිසුන් සහ තරුණ පූජාව අතර අලි සංරක්ෂණය පිළිබඳ දැනුවත්භාවය වර්ධනය කිරීම ද අනාගත පරම්පරාව සඳහා වැදගත් වේ.
අලි ඇතුන් යනු අපගේ පරිසර පද්ධතියේ අත්‍යවශ්‍ය අංගයකි. ඔවුන්ගේ පැවැත්ම මිනිසාගේ සහ පරිසරයේ සමතුලිතතාවය සඳහා ඉතා වැදගත් වේ. වාසස්ථාන අහිමි වීම, අලි - මිනිස් ගැටුම්, දඩයම් කිරීම සහ දේශගුණික විපර්යාස වැනි නර්ජන හමුවේ අලි ඇතුන්ගේ සංරක්ෂණය සඳහා කඩිනම් සහ සාමූහික ප්‍රයත්නයන් අවශ්‍ය වේ. රජයන්, රාජ්‍ය නොවන සංවිධාන, ප්‍රජාවන් සහ පුද්ගලයන් ලෙස අප සියලු දෙනා එක්ව ක්‍රියා කිරීමෙන් පමණක් අලි සම්පත රැකගෙන අනාගත පරම්පරාවට දායාද කළ හැකිය.
අලි සංරක්ෂණය යනු හුදෙක් සතුන් රැක ගැනීමක් නොව, අපගේ පෘථිවියේ ජීව විවිධත්වය සහ පරිසර පද්ධතියේ සමතුලිතතාවය ආරක්ෂා කිරීමකි.
No comments:
Post a Comment